El martes 11 d’avientu, a les 20:00 hores, nel Centru de Cultura Antiguu Institutu, l’escritor Xuan Xosé Sánchez Vicente presenta la so primer novela en castellanu, «No miréis al mar», editada por Septem Ediciones. Na presentación, amás del autor, va tar el periodista Fernando Canellada.
«No mireis al mar» empieza con una llamada de teléfonu a deshores de la nueche que pon en marcha dos llinies narratives qu’acaben xuntándose. La primera sigue les andances del copropietariu d’una empresa de servicios informáticos de Xixón que tien que treslladase a Madrid p’abrir ellí una sucursal. Paralelamente, la narración sigue a otru personaxe dende’l mesmu momentu en que cai’l frente de Xixón, n’ochobre de 1937. Con él va pintándose un frescu de la guerra y de la España franquista: les prisiones, la construcción d’ENSIDESA y la medría d’Avilés, los mieos y la represión na vida cotidiana. La novela traza un tapiz de pasiones personales, poder y corrupción política, con personaxes que entretexen les dos trames y les dos dómines y onde nun falta un análisis de la vida contemporánea asturiana y de les singularidaes que la caractericen.
Sánchez Vicente ye un nome fundamental del asturianismu políticu y cultural. Con más de trenta llibros publicaos, tanto de creación como d’investigación, esti mesmu añu, en mes d’ochobre, presentó’l so llibru «Ficciones y realidaes», onde axunta dellos artículos apaecíos en delles publicaciones.
